هي اصطلاح نامياري سماجي سائنسدان George Ritzer ، پنهنجي ڪتاب The Mc Donaldization of Society (1993)ع ۾ ڪتب آندو، جيڪو ترت تيار کاڌي (Fast Food) لاءِ عالمي سطح تي وڌندڙ طلب ۽ ان حوالي سان اسرندڙ نئين ڪلچر جي منظر نگاري ڪري ٿو، مئڪڊونالڊائيزنيشن“ جو اصطلاح هوٽل جي ڪاروبار سان لاڳاپيل Dick ۽ Mac نالي ٻن ڀائرن (جن جو ڪٽنبي نالو McDonald هو (، طرفان ڪئليفورنيا ۾ 1940ع ۾ قائم ڪيل هوٽلن جي سلسلي پٺيان پيو، جيڪي کاڌ و ترت تيار ڪري گراهڪن تائين پهچائيندا هئا. ان کان پوءِ آمريڪا ۾ هر شعبي ۾ ”ترت تيار ۽ استعمال ٿيندڙ شين“(Disposables) جو رواج پئجي ويو ۽ آخرڪار ان رواج ”عالمي ثقافت“ جو درجو حاصل ڪري ورتو. ان حوالي سان هي اصطلاح زندگي گهارڻ جي روايتي انداز کي تبديل ڪري، سائنسي انتظام (Scientific Management) تحت رهڻ جو عمل آهي. جنهن مطابق گهٽ مدي ۾ وڌ کان وڌ (سا به معياري) ڪارڪردگي، نئين عالمي ثقافت ۾ ڪاميابيءَ جي ڪنجي بڻجي ٿي. ” جارج زٽر“ طرفان هي اصطلاح فقط کاڌ خوراڪ، نه پروسيع تناظر ۾ جديد دور جي مغربي زندگيءَ جي طريقي ۽ ان ذريعي حاصل ٿيل ڪاميابين کي بيان ڪري ٿو